கதம்பம் – 7/9/08

காமராஜரை தற்பொழுது நாடார் சங்கம் தத்தெடுத்துக் கொண்டது போல் அவரது படம் அவர்கள் சங்க விழாக்களிலும் மற்றவைகளிலும் தென்படுகிறது. ஆனால் நாடார் என்பதற்கு கண்ணதாசன் என்ன பொருள் சொல்கிறார் பாருங்கள்.

சொத்து சுகம் நாடார், சொந்தந்தனை நாடார்
பொன்னென்றும் நாடார், பொருள் நாடார், தான் பிறந்த
அன்னையையும் நாடார், ஆசைதனை நாடார்,
நாடொன்றே நாடித்தன் நலமொன்றும் நாடாத
நாடாரை நாடென்றார்.

*************************************

இந்த முறை ஊருக்குப் போனபோது உடன் நண்பனொருவனை அழைத்துச் சென்றிருந்தேன். ரெம்ப நாள் கழிச்சுப் போனதால நல விசாரிப்புக் கொஞ்சம் பலம். ஆனா நண்பன்தான் கடுப்பயிட்டான்.

ஆருடே பச்சைமுத்து பேரனா? சும்மாயிருக்கியா?
நல்லா இருக்கேன் பாட்டா
தொழில் எப்படிடே இருக்கு.
நல்லா இருக்குப் பாட்டா.
செரிடே சூதானமா இரு.

ஆரது பேச்சியம்மை மவனா?
ஆமா ஆச்சி.
ஏலே சும்மாயிருக்கியா?
நல்லா இருக்கேம் ஆச்சி
அம்மை சும்மா இருக்கால்லா?
ஆமா ஆச்சி சும்மா இருக்காவ.
சாக்கிரதையாப் பாத்துக்க.

என்ன மருமகப்பிள்ள தூரமா?
இல்ல மாமா விளை வரைக்கும்.
சும்மா இருக்கியா? பிள்ளியோ சும்மா இருக்கா?
நல்லா இருக்கம் மாமா, பெரியவ காலேஜ் போறா சின்னவ 7 ஆவது.

இதே மாதிரி சும்மா இருக்கியா விசாரிப்புத்தான் அதிகம்.

ஒரு கட்டத்தில் பொறுமை இல்லாமல் கேட்டான், “ஆமா சும்மா இருக்கியான்னா என்னடா?”

”சுகமா இருக்கியா என்பதின் மரூஉ.”

************************************************

நான் சென்ற திருமணம் ஒரு கோவிலில் நடந்தது. திருமணத்திற்கு என் அண்ணன் மகள் கல்லூரியில் படிக்கும் தன் தோழியரை அழைத்து வந்திருந்தாள். அவர்களை எனக்கு அறிமுகப் படுத்திச் சொன்னாள், “எங்க சித்தப்பா நல்லா ஜோக் சொல்லுவாரு. சித்தப்பா இப்ப ஒரு ஜோக் சொல்லுங்க”

ஒருத்தன் சாமிகிட்ட ரெம்ப வேண்டிக்கிட்டு தவம் இருந்தான். சாமியும் அவன் தவத்தை மெச்சி, ”பக்தா உன் பக்தியை மெச்சினேன். உனக்கு 3 வரம் தருகிறேன். உனக்கு வேண்டியதைக் கேள்”

நம்மாளு ரெம்ப நேரம் யோசிச்சான்.

பிறகு கேட்டான், “சாமி, எனக்கு ஒரு பை நிறையக் காசு, எனக்கு ஒரு பெரிய வாகனம், என்னைச் சுற்றிப் பெண்கள் கூட்டம், அம்புட்டுத்தேன்”

சாமியும் ரெம்ப நேரம் யோசிச்சுச் சொன்னார், “ சரி ஒரு 5 நிமிஷம் கண்ணை மூடித்திற”

கண்ணத்திறந்து பார்த்தா நம்மாளு லேடிஸ் பஸ் கண்டக்டர்.

**************************************************

இருப்பு

உங்களுக்கு சாத்தியமாகிறது
நண்பனின் வீடு செல்வதும்
உரையாடுவதும்
நட்பையே சுற்றமாய்
வரித்துக் கொள்வதும்

இருப்பினும்
சுதந்திரக் காற்றின் போதாமை
அவ்வப்போது வெளிப்படத்தான் செய்கிறது.

எங்களை ஒப்பிட்டு
உங்களைப் பாவம் எனும் போக்கு
மிகச் சிறந்த அங்கதம்

அவ்வப்போது கேட்பதுண்டு
என்னகுறை உமக்கென?
சரிதான்.

என்றேனும்
அருகாமையிலிருக்கும்

நெருங்கிய நட்பின்
இறுதி அஞ்சலியில்
பங்கேற்காமல் போனதுண்டா?

ஒரு முறை தவிர்த்துப் பாருங்கள்
உணர்வீர்கள் எங்கள் இருப்பை

நன்றி: “பெருவெளிப்பெண்”
ஆசிரியர்: ச.விசயலட்சுமி
வெளியீடு: மித்ர ஆர்ட்ஸ்& கிரியேஷன்ஸ்

**************************************************

80 கள்ல வந்த பாட்டு ஒன்னு. ரெண்டாவது சரணம் மட்டும் மனசில இருக்கு பல்லவி பிடிபடல. ஓரிரவு நாமக்கல் சிபியுடன் சாட் செய்யும்போது சட்டுனு எடுத்துத்தந்தார். நீங்களும் கேளுங்க. சூப்பரா இருக்கும்.

me: 80களில் வந்த பாட்டுக்கள் பரிச்சயமிருக்கிறதா?

22:46 namakkalshibi: எல்லாப் பாடல்களும் இல்லை

ஃபேமஸ் பாட்டுக்கள் சில தெரியும்

me: ஒரு பாட்டு சரணம் சொன்னால் அந்தப் பாட்டுத் தேடித் தர முடியுமா?

namakkalshibi: டிரை பண்ணலாம்

22:48 me: முதுமை ஒரு நாள் நமை வந்து தீண்டும், மூன்றாம் காலில் நாம் நிற்க வேண்டும். முடியைப் பார்த்தால் முழு வெள்ளை.மடியில் தவழும் மகன் கிள்ளை. நீ ஏந்திக் கொஞ்ச நான் கொஞ்சம் கெஞ்ச, இருக்கும் வரைக்கும் எனை தினசரி அனுசரி.

namakkalshibi: ம் டிரை பண்ணுறேன்

22:50 http://myspb.blogspot.com/2007/05/blog-post_04.html

இந்த லிங்க் பாருங்க

22:51 குங்குமச் செங்கமலம்

இள மங்கையின் தங்க முகம்

me: ரெம்ப காலமாத் தேடுனேன். நன்றி சிபி.

namakkalshibi: நன்றி

22:52 எல்லாப் புகழும் கூகிளாண்டவருக்கே

அதுவுமில்லாம பாடும் நிலா பாலு பிளாக் குழுவினருக்கும்

22:53 me: அந்தப் பாட்டுக் கேட்டிருக்கீங்களா?

namakkalshibi: இல்லை இப்பத்தான் கேட்கிறேன்

நல்லா இருக்கு

அறிமுகப் படுத்தியமைக்கு நன்றி

22:56 me: சரணம் முடியாமலே மீண்டும் பல்லவி எடுப்பார் பாருங்க சூப்பரா இருக்கும்.

namakkalshibi: ஆமா