க சீ சிவக்குமார்

பாஸ்கர் சக்தியின் முயல் தோப்பு

தினவாழ்வில் நாம் எதிர்கொள்ள நேரிடும் சாதரண மனிதர்களைக் கதை மாந்தர்களாகக் கொண்டவைதான் பாஸ்கர் சக்தியின் புனைவுகள். ”முயல் தோப்பு” அச்சட்டத்தில் வெகுவாகப் பொருந்துகிறது.

இரட்டையர் என அறியப்பட்ட க.சீ.சிவக்குமாரும் இவரும் சமகாலத்தில் எழுத வந்தவர்கள். பொருள்தேடும் சூட்சுமம் க.சீ.சிக்கு பிடிபடாமல் போனது. குறைந்தபட்ச சமரசம் என்ற சூத்திரத்தைக் கைக்கொண்டு பாஸ்கர் சக்தி, தன்னைத் தக்க வைத்துக் கொண்டார். எழுத்தாளன் சிலகாலமேனும் பொருளாதாரச் சிக்கலின்றி உயிர்வாழ்வது  எழுத்துக்கு நல்லது. மேலும் சில படைப்புகள் வரக்கூடும்.

தொகுப்பிலுள்ள கதைகள் பெரும்பாலும் தேனி சுற்று வட்டாரத்தை கதைக்களமாகக் கொண்டவை. மனிதர்களின் உறவுச்சிக்கல்கள், அதன் தாக்கமான விரிசல்கள், வன்மம், குரோதம் போன்றவை வெகு எளிதாக எந்தவித ஓங்காரமுமின்றி வெளிப்படுகின்றன.

தலைப்புக் கதையான முயல்தோப்பு, தானே உண்டாக்கிய தோப்பை தன் வம்சத்தினர் விற்றுக் காசாக்க முயல்வதை எதிர்ப்பதுதான். உண்டாக்குதல் என்பது வலி மிகுந்தது. தரிசாக, புதர்மண்டிக் கிடக்கும் காட்டை கொஞ்சம் கொஞ்சமாகச் சீராக்கி, விளையாக்கி, நீர் பாய்ச்சி நேராக்கி என அது ஒரு தவம். கர்ம யோகம். வெளியிலிருந்து பார்க்கும் நமக்குப் புரிவதில்லை, ஒரு இடத்தை விற்க ஏன் இத்தனை அழிச்சாட்டியம் என. ஆனல் அது அவர்கள் ஆன்மாவுடன் தொடர்பிலிருப்பதை நாம் ஒரு போதும் புரிந்து கொள்ள முயற்சிப்பதில்லை.

என்றாலும் என்னளவில் “உடல் உறுப்புகள்” என்ற கதையே சிறந்தது எனச் சொல்வேன். எத்தகைய சிற்பமாக இருந்தாலும் அப்படியே நகலெடுத்ததுபோல் வார்ப்பில் வடித்துவிடும் கலைஞன், தினவாழ்வை எதிர்கொள்ள நேரிடும் சிக்கல்களச் சொல்கிறது. இறுதியில் அவரது திறமை பயன்படுத்தப்படுகிறது என்றாலும் அவருக்கு ஆதம திருப்தி கிட்டியிருக்குமா என்ற கேள்வியினை முன் வைத்து முடிகிறது கதை.

தேவையற்ற அலங்காரங்கள், வார்தைச் சிலம்பங்கள் ஏதுமற்ற எளிய கதைகள்.

குண சித்தர்கள் – க சீ சிவக்குமார்.

”கன்னிவாடி” சிறுகதைத் தொகுப்புத்தான் க.சீ.சிவக்குமாரின் எழுத்தில் நான் முதலில் படித்தது. அவரது எழுத்துக்களில் இருக்கும் மெல்லிய நையாண்டியும் அவருக்கென்று கைவரப்பெற்ற விசேச மொழிநடையும் என்னை ஈர்த்தது.

தொடர்ந்து அவரது மற்ற எழுத்துக்களான “என்றும் நன்மைகள்” சிறுகதைத் தொகுப்பும், “ ஆதிமங்கலத்து விசேசங்கள்” என்ற கட்டுரைத் தொகுப்பும் வாசித்திருக்கிறேன். ஆ.ம.விசேசங்கள் அவரது ஆகச்சிறந்த படப்பு எனலாம். தன்னை மறந்த சிரிப்புக்கு உத்திரவாதம்.

”குணசித்தர்கள்” குங்குமத்தில் தொடராக வெளிவந்தபோது சில கட்டுரைகளைப் படிக்க வாய்த்தது. மொத்தமாகப் படிக்கையில் வாழ்க்கை மற்றும் உடன் வாழும் மனிதர்கள் குறித்தான கூர்ந்த கவனிப்பும் அக்கறையும் அவர்கள் மீதான மெலிதான சற்று பகடி கொண்ட வருத்தமும் தெரியவருகிறது.

கட்டுரைக்கான தலைப்புகளே வித்தியாசமாக இருக்கின்றன. பிறவிக் கவிராயன், அதிரக சூடாமணி, செல்வக் கடுங்கோ கோழியாதன், தேவேந்திரன் சுர அசுரன், தீவ திலகை, பகலுறங்கும் பெருமான், எரிதழல் வேலவன், பூட்டு ஜான், மன இறுக்கன் என நல்ல நகைச்சுவைக்கு உத்திரவாதமான கட்டுரைகள்.

கிழக்கு வெளியிட்டுள்ள இப்புத்தகம் 216 பக்கங்களைக் கொண்டது ரூ.125 விலை மதிப்புள்ளது.

ஆசிரியரின் வலைத்தளம்